SoLa 2023 - Mäntig
Buongiorno! Scho frühe am Morge het sich de Bruno sin Fuess verletzt. Das het üs aber natürlich nöd devo abghalte zum de Tag mit feine Nutellabrötli zstarte. Noch dem mir bim zMorge zuegschlage hend, isches wiiter gange mit üsere traditionelle Chligruppezit. Zum üs besser i üses neue Dihai ihzfinde hend mir vo de Iiheimische glernt wiemo als guete Älpler so lebt.
Bevor mir üs gstärcht hend sind sich de Bruno und de Duri id Hoore cho, will de Bruno en Stuehl bsetzt het wo luut em Duri ihm nöd zuestoht.
Trotz em Striit hend mir üs en feine z’Mittag verdient.
Yamyam und abegohts!
Üs isch aber schnell ufgfalle, dass sich d Situation mit de Habsburger schnell zuespitzt. Ihri neue Regle hend ihren Weg trotz de grosse Distanz zu üs gfunde. Die Regle hend e grossi Unruhe uf üsem Lagerplatz verursacht und jede suecht bi jedem d’Schuld. Deswege heds druf ab es Turnier zwüschet de drü Urkantön geh zum bewiise wer de Besser isch.
Noch em intensive Kampf vo de Kantön hend mir usgiibig Zit verbrocht mit Gmeinschaft, Spieli und Bade. Denoch hets en feine z’Nacht geh, kochet vo üsere tolle Alpechuchi.
Noch em Esse isch bekannt geh worde wer sTurnier gwunne het, (*trommelwirbel*, Uri het gwunne), zu leide vo de beide andere Kantön Schwyz und Unterwalde. D Landammänner hend sich nöd zfriede geh mit em Resultat, wa zumne grosse Konflikt gführt het.
Uri het sich vom Rest vo de Gmeinschaft abgsonderet zum de Sieg fiire, während alli andere sich parat fürs Bett gmacht hend. Doch die Aktion wird nöd ohni Folgä bliebä….Schlussendlich lieged jetzt aber alli friedlich im Bett und pfuuset tüüf und fest…oder doch nöd alli?
Aber über da erfahret ihr morn meh und bis döt hi wünschet mir eu e ganz e gueti Nacht. Sogni d’oro!