SoLa 2023 - Ziistig
Benvenuti a tutti! En neue Tag isch bi üs uf de Alp wieder ahbroche und wie chöntmo de Tag besser starte als mit emne feine z’Morge? Feine z’Morge, stilli Ziit, Gmeinschaft..was will mo meh a somne Morge?
Noch dem mir üs gsättiget hend, het üs d Sonja mit de Aloe zeme s Buurelebe chli nöcher brocht. Sie hend üs alles bibrocht uf was mir münd achte, wenn mir en Acker bepflanze wönd. Allerdings sind immer wieder Missverständnis uftrette zwüschet de drü Kantön ,wo bi üsne Landammänner zu heftige stritt gführt het.
Während die meiste friedlich i erem Schlofsack pfuuset hend gester, isches für es paar einzelni Jungschärler und Jungschärlerinne no wiiter gange. Sie hend letscht Nacht eren Muet unter bewiis müsse stelle zum zeige, dass sie’s verdient hend zum en Jungschiname zbecho. Die letscht Etappe vo de Muetprob hend sie dörfe vor üs allne absolviere, de traditionell Zaubertrank.
Eimol meh hend üsi Kantonsführer müsse stritte und damol so fest, dass s’Vreni gfunde het, dass do irgendöppis nöd chan stimme. Deswege hend mir üs entschiede zum dem uf d’Spur zgoh. Verpackt imne coole Gländspiel hend mir versuecht de Ursprung vo dene viele Konflikt usezfinde.
Noch em Spiel hend mir zwor usegfunde wo de Hocke liit, aber da het nur zu no meh Usenandersetzige gführt, bis de Bruno und Duri igschritte sind. Sie hend üs erklärt, dass es nöd wert isch üs ständig gegesiitig ahzschuldige und dass Vergebig und Versöhnig s einzige isch wo üs helfe wird. Druf ab hend üsi Landammänner ihri Fehler igseh und sich dezue entschiede zum de Kantönligeist hinder sich zloh und enand zvergeh.
Noch dem mir üs alli wieder versöhnt hend, hend mir de Obig usklinge loh mit emne feine z’Nacht, spannende Input, Singe und verwiile.
De traditionelli Bruuch vom Zäurli dörf imne Urschwizer Lager natürlich nöd fehle ;)
Ez isch de Zistig au scho wieder verbi und uf üs wartet no ganz viel meh Abentür morn. Mir hoffet eu gohts au guet und wünschet eu e gsegneti nacht. Buona notte a tutti!