SoLa 2023 - Mittwoch
Ciao a tutti! En neue Tag isch ahbroche und mir sind vo musikalische Ihlage gweckt worde. Z’Morge hets wie immer feini Nutellabrötli geh. Bevor mir aber de z’Morge hend chöne gnüsse hets eimol meh neui Habsburgerregle geh, wo üs üses Lebe i üsem Dorf erschweret. Ab jetzt münd mir 10 Hampelmänner mache vor jedem Esse und 3 Froschgümp bevor mir ufs Hüsli chönd.
Will mir jetzt so viel Lüüt i üsem Dörfli sind und gester viel Ackerland gwunne hend , hend mir am Gärri öppis guets wölle zruggeh. Us dem Grund hend mir üsi Ernti chöne verwerte und Produkt zum handle produziere.
Am Mittag sind mir wieder genial bechocht worde und hend üsi Büch voll gschlage.
Am Nomi hend mir üs e schöni Usziit gönt zum chli abefahre und üsen schöne Lagerplatz zgnüsse. Jedoch isch zmizt i üsere Erholig Post vo de Habsburger cho, wo üsen schöne Nomi unterbroche het. Anstatt Freizit hets no e müehsami Schuelig über die östrichischi Monarchie geh. So en Kaiserschmarre!!
Am Obed isch üs ufgfalle, dass mir no ganz viel Esse vorrig gha hend vo üsere rieche Ernti und hends wölle zeme choche. Do mir aber zviel Lüüt gsi sind zum alli zeme a eim Füür zsitze, hend mir üs i üsi Familie ufteilt und hend im chline Rahme en gmüetliche Obed verbrocht.
Trotz starchem Rege am Schluss vom Obed, hend mir de Tag schön und gmüetlich chöne Abschluss. Morn gohts bi üs mit ganz vielne neue Abentür wiiter. Bis döt ane seget mir: Buona notte!