SoLa 2023 - Friitig
Grüezi wohl mitenand. Mit emne wunderbare Freiheitsgfühl sind mir am Friitig ufgstande, meh vereint wie jeh zuvor. Dur üsen neu gschlossen Bund hend sind mir stärcher. No dezue het sich d Möglichkeit ergeh zum neui Mitglieder i üsen Bundesrot zwähle do mir jetzt ei grossi Nation sind. Doch bevor mir üs de Politik gwidmet hend, hets natürlich z’Morge geh.
De Bundesrotswahlkampf het prompt noch em z’Morge gstartet. De Wahlkampf isch hart zue und her gange aber noch intensive Kampagnevorbereitig hend mir über d Kandidate abgstumme. Nöd lang isch es gange und mir hend üsen neue Bundesrot gwählt gha.
Noch de strenge Abstimmig und dere Achterbahn vonere Wuche hends mir verdient zum mol so richtig zfeste. Wies de Zuefall will isches jo de 1. August gsi und mir hend de Tag als üsen Nationalfiirtig deklariert.
Wie immer hend üs ganz viel Chind und Leiter mit tolle biiträg beschänkt. 
S'Geniale Leiterteam hinder dem riese SoLa. Es wiiters hammer Lager wo ohni de geniali Ihsatz vo jedem einzelne nöd möglich gsi wär! Es riiese grosses Dankeschön a eu alli, ohni eu wär das alles nöd möglich gsi!
Da Lager hend mir mehreri Leiter:inne müsse verabschiede, sie wiiter ziehnd und ihri Karriere als Jungschileiter:inne beendet.
Jo, jetzt isch de Tag glich cho a dem mir üsen Hauptleiter, Mitleiter und Zeltleiter müsse verabschiede. Mit em Lee goht e Sagehafti Era z end und mir werdet en ganz fest vermisse i de Jungschi. Üsi Wort chönd gar nöd efasse wie dankbar, dass mir sind für alles Herzbluet wo de Lee id Jungschi gsteckt het. Mir sind unendlich Dankbar für de Lee und freued üs, dass er es neus Kapitel i sim Lebe dörf ahfange!
Aber de Obig isch nöd nur truurig gsi; mir hend glichzitig au üsi neu Hauptleiterin dörfe ihsetze. E Era goht z End und e anderi fangt ah; d Lemon Era het dodemit offiziell ahgfange!
Au üsi Chuchi het eimol meh en sensationelle Job gmacht! Mir danket tuusig für die riese Arbeit wo ihr au i dem Johr für üs gleistet hend.
Da isch jetzt scho de letzti obed vo üsem SoLa gsi und mir chönds chum glaube wie schnell die Ziit ume isch. Vor üs liit no en allerletzti Tag womo s Lager zeme abschlüsse dörfet. Aber bis es sowiit isch gnüssemo no jedi Minute wo mir mitenand verbringe dörfet. Guet Nacht mitenand!